Mislim da je more zaslužilo svoje mjesto na mom blogu , pa mu poklanjam ovaj post..
MOJE MORE
Kako si ti velo
Kako si ti moćno
Ki put si olujno i jadno
I zet ćeš ono ča mi je
Najdraže blago
A kad te bjes pasa
Kad svoj jad kalaš
Onput si kod dite miće
Ča se samo sobun igra
Zibaš se nježno, pomalo
Zoveš me da se s tobun igran
A kad se umiriš od igre
I sunce te obasja
Tvom sjaju nima kraja
Zlatiš se kod najveće blago
Svoju lipotu ne skrivaš
Uživaš
Jer znaš da niš na svitu
Ni lipje od tebe
Moje more
MOJE MORE
Jedino za te vrime ne postoji
Tvoja leta su vječna
Se oko tebe je pasivalo
Ma ti si vavek ostalo
Ti čuvaš tajne postanka
Kad bi baren čovik razumel
Tvoju pjesmu vala
Tvoje šumove
Tvoje jecaje...
Tebe niki niš ne more
Tvoja snaga nima kraja
Ti si raj i pakal na zemji
Kolika srca su za te kucala
A ti si ih zelo
Ma sejedno vavek će za te
Jubav va čoviku živet
Va te kod va Boga gledan
Strah i poštovanje prema tebe ćutin
Tebe se molin
Tebe volin....
3 komentara:
PREDIVNO..!
Bimbi, evo san bija i potpuno se s tebon slažen da je ova pisma zaslužila puno, puno višje od jedneg štureg komentara. Samo, u vrime kad si ovo objavila, ni ja, a ni mnogi drugi, nismo znali za te i tvoj blog. Predlažen ti da ovo refreširaš, odnosno objaviš ponovo! A ni ovo ča si u mene proštila nije moja prva pisma o moru, jeman ja tega još i sve su bile objavjene!
@Hval ti Ante. Iman i ja pun fasikal pjesmi na čakavštini. Ova prva mi je nekako posebno draga.
Objavi komentar